Аб'ектыў 19.04.2017 Вясна склала спіс суддзяў, якія выносяць палітычна матываваныя прысуды



40 базавых велічыняў – то бок 920 рублёў. Гэткі штраф, паводле суда, мусіць сплаціць наш калега з Гомля Яўген Меркіс. Журналіста судзілі адразу паводле двух адміністратыўных пратаколаў – за онлайн-трансляцыю з акцыяў супраць дэкрэту нумар тры ў Пінску ды Магілёве. Яўгена абвінавацілі ў незаконным вырабе і распаўсюдзе прадукцыі медыяў без акрэдытацыі.

Яўген Меркіс, журналіст:

Сваёй віны я не прызнаў паколькі права на збор і распаўсюд інфармацыі гарантавана канстытуцыяй, а ў гэтых гарадах я як журналіст не мог не прысутнічаць, паколькі нам неабходна ведаць што адбываецца ў нашай краіне, чаму людзі выходзяць што іх абурае

Нязгодных жа з палітыкаю кіраўніцтва краіны працягваюць затрымліваць і судзіць, чарговы суд над Наталляю Папковай адбыўся ў Берасці. Учора актывістцы аргкамітэту Беларускай сацыял-дэмакратычнай партыі (Народная Грамада) і «Маладой Беларусі» прысудзілі штраф за пераход праз вуліцу ў нявызначаным месцы. Сёння працэс працягнулі ды асудзілі за непадпарадкаванне міліцыянтам, якія яе затрымлівалі.

Пасля актыўнага ўдзелу ў акцыях «недармаедаў» Наталлю Папкову каралі соднямі арышту, штрафамі ды нават вазілі ў псіхіятрычную лякарню. Праваабаронцы лічаць, што ўлады адмыслова імкнуцца паказаць апазіцыянераў у непрывабным святле. А міліцыя даўно не выконвае сваёй функцыі абаронцы закону.

Адбываліся ж сёння не толькі суды, але і вызваленні

На волю выйшаў апошні вязень, арыштаваны за адзначэнне Дня Волі ў Менску, – Леанід Кулакоў. Яго пакаралі найдаўжэйшым арыштам – 25 содняў. Актывіста «Еўрапейскай Беларусі» абвінавацілі ў парушэнні парадку правядзення масавых акцыяў, а таксама ў супраціве і непадпарадкаванні патрабаванням службовых асобаў.

Леаніда Кулакова сустракалі палітыкі, грамадскія актывісты і сябры. Адразу ж яму перадалі новыя позвы – ужо праз два дні актывіста зноў чакае суд.

Глядзі таксама
Каментары