Заснуў за стырном, з’ехаў у кювет. Аўтобус «Экалайнс» маршруту Менск-Адэса трапіў у аварыю ва Украіне.
Здарэнне мела месца ў Жытомірскай вобласці. Гэта ўжо трэцяя аўтобусная аварыя, у якой апынуліся нашыя суайчыннікі за мяжой. Як выбраць адпачынак, каб не трапіць замест мора ў шпітальны ложак?
Ехалі на пляж, заваліліся ў кювет. Паводле сведчання відавочцы, аўтобус перасек сустрэчную і вылецеў за ўзбочыну.
«Кіроўцы памяняліся пасля мяжы. Першы пайшоў спаць, другі за стырном выключыўся. Пакуль ехалі па жахлівай дарозе, ён еў цукеркі ды трымаўся, а як выехалі на добры кавалак, заснуў».
На шчасце, ніхто не пацярпеў.
Але аварыі з удзелам беларусаў у гэтым месяцы перасталі быць рэдкасцю. Пасажырам, якія на мінулым тыдні ехалі з Гомля ў Адэсу, пашчасціла куды меней. Бусік урэзаўся ў зламаны цяжкавік, прыпаркаваны з правага боку. Кіроўца і яшчэ 4 пасажыры загінулі на месцы, 12 чалавек трапілі ў мясцовы шпіталь.
Аварыі адбываюцца не толькі ва Украіне. У пачатку ліпеня аўтобус з беларускімі дзецьмі перакуліўся ў Румыніі. Дзеці ехалі на мора ў Балгарыю. Усё абышлося драпінамі.
Аўтобусныя перавозчыкі прывабліваюць беларусаў сваймі нізкімі коштамі. Замест купэ ў цягніку або хутчэйшага самалёта нашыя суайчыннікі выбіраюць менш зручныя, але куды больш танныя аўтаперавозкі. Але таннасць не азначае бяспекі.
Гэтак, напрыклад, з Гомля трапіць наўпрост на мора можна нават за 50 рублёў. Чыгункаю такая паслуга будзе каштаваць прынамсі ў два разы даражэй.
Але вяртаючыся да аварыі. Сяргей Штода – кіроўца з вялікім стажам – сцвярджае: у доўгіх аўтобусных падарожжах адзін кіроўца не можа кіраваць больш за 4 з паловаю гадзіны запар. А ў надзвычайным выпадку ўсё ж лепш спазніцца на вакзал, чымся паспець на той свет.
«Трэба было зрабіць нейкі комплексны прыпынак каля якой-небудзь кавярні альбо на запраўцы. І проста паўгадзіны паспаць. Адысці ад графіку. Думаю, усе б людзі згадзіліся», – кажа Сяргей Штода.
Аварыя можа здарыцца з любым перавозчыкам, і цана квіткоў, на думку эксперта, – усё ж не паказнік. Тым не менш пры выбары фірмы варта звяртаць увагу на агульныя водгукі пасажыраў, а таксама на тэхнічны стан аўтобуса.
«Трэба пасажырам трохі смялей не забываць пра свае правы. Кожны грамадзянін – ён таксама кліент, можа задаць нейкае пытанне і зрабіць заўвагу», – кажа Сяргей Штода.
Дадаткова, ёсць яшчэ адна рэч, якая здольная часткова засцерагчы вас ад траўмаў.
У Беларусі пакуль рамяні бяспекі ёсць не ў кожным аўтобусе. Тым не менш, калі такое прыстасаванне маецца на вашым сядзенні, варта з яго скарыстацца. Можа, не так выгодна, але ўсё ж менш рызыкоўна.
Вітаўт Сіўчык belsat.eu
ВІДЭА. ФОТА
FACEBOOK.COM/NASCJA MASHCHAVA
MK.NPU.GOV.UA
vk.com/zhl_good
adevarul.ro