Гомель. І гісторыя, якой няма канца. Змаганне незалежнага журналіста Сяргея Ляпіна з дзяржаўнымі прапагандыстамі. Узаемныя судовыя пазовы і закіды. Хто каго? «Gomel today» ці «Гомельская праўда»?
Гэтак журналіст і архітэктар Сяргей Ляпін акрэсліў першы дзень судовага паседжання ў справе, якую распачало супраць яго мясцовае выданне. «Гомельская праўда» пакрыўдзілася на актывіста за фота, на якім ён трымае газету над сметніцаю. У заяве адзначаецца, што фота, нібыта, «не адпавядае рэчаіснасці».
«Яны сёння ўпэўненыя што іміджавыя страты выданне нясе ад таго фотаздымку дзе я выкідаю нумар газеты з абразлівым артыкулам у сметніцу», – патлумачыў Сяргей.
На месцы, дзе раней былі габрэйскія могілкі, у Гомлі будуецца шматпавярховік. Архітэктар раскрытыкаваў дзеянні ўладаў і забудоўніка. У адказ мясцовыя медыі, у тым ліку і «Гомельская праўда» апублікавалі шэраг абразлівых артыкулаў, дзе называлі Ляпіна, між іншага, «правакатарам».
«Пасля тых артыкулаў «Гомельскай праўды» я падаў першую позву на газету, пазней была позва ад забудоўшчыка што скончылася міравым пагадненнем, а пазней позва ад «Гомельскай праўды», – узгадвае храналогію незалежны журналіст.
Калі суд стане на бок газеты «Гомельская праўда», то найбуйнейшаму гомельскаму рэсурсу «Gomel today», які выступае суадказнікам у справе, пагражае закрыццё, бо два папярэджанні ад
Міністэрства інфармацыі рэсурс ужо мае.
«Гэта адна з праяваў знішчэння свабоды слова ў нашай краіне, гэта сто адсоткаў. Я нават не здзіўлюся калі гэта была замова зверху, затыкаюць рот настолькі, што нельга нават зрабіць здымак з дзяржаўнай газетай якую выкідаеш у сметніцу», – абураецца блогер Максім Філіповіч.
Дату наступнага паседжання ў справе яшчэ не прызначылі.
Ірына Дарафейчук, «Белсат» Фота: Максім Філіповіч