У калгасе мела месца выхаванне, а не праца. Гэтак палічыў суд Маладзечанскага раёну і не задаволіў пазову бацькі 13-гадовай Вікторыі Папчэні, якая напрыканцы верасня загінула на бульбяным полі пад коламі МАЗу.
«Але гэта ўсё роўна праца. Гэта не вучоба, яны там не вучыліся на полі, чаму яны там вучыліся? І хто іх там выхоўваў, цікава? Гэта добраахвотна-прымусовая праца».
Алег Папчэня патрабаваў прызнання працоўных дачыненняў паміж школьніцаю і калгасам «Усход-Агра», куды 29 верасня дзяцей адвезлі на збор ураджаю. Суд пастанавіў, што выезд адбываўся ў межах вучэбна-выхаваўчага плану маладзечанскай школы. Адмова суддзём факту працы грунтавалася на тым, што, па-першае, на полі ў той момант фармальна не было асобы, якая б магла прыняць на працу, а, па-другое, не было вакантных штатных адзінак.
«У дадзеным выпадку суддзя глядзіць так скажам на фактуру, якая ёсць, больш, чым на саму сутнасць права. Бо атрымліваецца, што нават калі і няма вольных месцаў, але людзі прыехалі і працуюць, то значыць яны не працуюць. Ну так атрымліваецца па гэтай логіцы».
Да таго ж не зразумела, у якім выхаваўчым працэсе бралі ўдзел дарослыя, працаўнікі розных арганізацыяў, якіх таксама ў той дзень прыслалі на поле паводле разнарадкі. Андрэй Стрыжак упэўнены, што суддзя ігнаруе агульныя прынцыпы працоўнага права.
«Па сутнасці артыкула 25-га Працоўнага кодэксу Рэспублікі Беларусь самі працоўныя адносіны ўзнікаюць па факце іх пачатку. Чалавек узяў бульбіну ў руку, чалавек паклаў яе ў вядро – чалавек ужо працуе».
Таму разбірацца ў справе, упэўненыя пазоўнікі, мусіць Дэпартамент дзяржінспекцыі працы. Але, паводле рашэння суда, спецрасследаванне няшчаснага выпадку правядзе аддзел адукацыі Маладзечанскага райвыканкаму. І гэта пры тым, што менавіта з іхнага дазволу дзяцей паслалі на поле і сам аддзел адукацыі праходзіць у справе як адзін з адказчыкаў.
«Воўк шукае зніклую авечку», – здзіўляюцца ўдзельнікі працэсу.
«То бок калгас з сябе паўнамоцтвы зняў, аддзел адукацыі зараз будзе круціцца-выкручвацца і толькі адно гора гэтым бацькам і грамадству ў цэлым. Таму што сёння адна дзяўчынка, заўтра ў радзільні другая дзяўчынка».
Бацькі Вікторыі працягнуць змаганне – цягам 10 дзён Алег Папчэня з памочнікамі пададуць касацыйную скаргу на рашэнне суда.
Таццяна Рэут, «Белсат»