Справа Коржыча. «Чалавек, які вырашыў здзейсніць самазабойства, можа звязаць сабе рукі, але не ногі»
Асноўнае пытанне справы максімальна цынічнае: ці варта самазабойцу звязваць сабе ногі і нацягваць на галаву майку перад апошнім сваім чынам. Ад адказу на яго залежыць не толькі лёс некалькіх чалавек, але і імідж беларукага войска.
У якасці эксперта суд запрасіў кіраўніка кафедры судовай медыцыны Беларускага дзяржаўнага медычнага ўніверсітэту, прафесара Алега Чучко. Паводле яго, чалавек, які вырашыў здзейсніць самазабойства, можа звязаць сабе рукі ў якасці пэўнай падстрахоўкі – каб не было магчымасці перадумаць і ў апошні момант сарваць пятлю. Ігар Ільяш, журналіст «Белсату»:
«Але калі чалавек не звязвае рукі, а звязвае толькі ногі, – такога выпадку ён за 55 гадоў сваёй практыкі не сустракаў. І ў спецыялізаванай літаратуры таксама не сустракаўся з такімі выпадкамі».
Калі ж летась у кастрычніку ў вайсковай частцы Печы салдата тэрміновай службы Аляксандра Коржыча знайшлі павешаным, у яго звязаныя былі менавіта толькі ногі. Таксама на галаву была нацягнутая майка. Не надта тыповы сцэнар для самазабойцы. Вялікім пытаннем застаецца і той факт, што згодна з афіцыйнай інфармацыяй Коржыч правісеў у пятлі практычна тыдзень – ягонага знікнення немагчыма было не заўважыць. Маці Аляксандра версія самагубства не падаецца пераканаўчай.
Святлана Коржыч, маці Аляксандра Коржыча:
«Ніяк ніколькі не веру, таму што апошняя яго размова была: «Мама, я хачу адслужыць, каб усё гэтае скончылася, і спаць спакойна. Я хачу аддаць доўг радзіме і сваёй сям’і».
Не схільным да самагубства лічыўся і жаўнер Сяргей Ясюкевіч, цела якога знайшлі месяц таму на Гарадзеншчыне. Паводле афіцыйнае версіі, ён пакінуў вайсковую частку і наклаў на сябе рукі з асабістых прычынаў. Родныя таксама не вераць у гэтакі варыянт развіцця падзеяў, як і ў справе Коржыча.
Ігар Ільяш, журналіст «Белсату»:
«Забойства – гэта ўсё ж больш цяжкое злачынства. І яно ставіць пад пытанне легітымнасць усёй армейскай сістэмы. Таму ўлады былі б больш зацікаўленыя менавіта ў версіі самагубства. Але, падкрэслю, мы не разумеем да канца, што гэта было».
Згодна з маці загінулага жаўнера Святланай Коржыч, за магчымасць пайсці ў звальненне на тры дні лейтэнант Андрэй Сукавенка патрабаваў у яе сына айфон. Цяпер Сукавенкам і прапаршчыкам Артурам Вірбалам займаецца суд, а сярод пацярпелых ад іхных дзеянняў – сяржанты Яўген Бараноўскі, Ягор Скуратовіч і Антон Вяжэвіч, дзеянні якіх, паводле следства, і прывялі да смерці Аляксандра Коржыча. Сапраўды – злачынны ланцуг.
Аляксандр Лукашэнка, кіраўнік Беларусі:
«Гэта мы будзем выпальваць гарачым жалезам. Я і міністру абароны, і ўсім сказаў, што не дай Бог падобныя будуць выпадкі».
Але, як відаць, жалеза не надта гарачае. Святлана Коржыч, маці Аляксандра Коржыча:
«Паглядзіце самі. Начальнік навучальнага цэнтру – палкоўнік Чарнецкі, на ягоным сумленні чатыры трупы за год. І ён ідзе на павышэнне – начальнікам упраўлення Міністэрства абароны. І чалавек без згрызотаў сумлення застаецца ля ўлады».
Як на месцы, напрыклад, і Андрэй Раўкоў, адстаўкі якога з пасады міністра абароны грамадскасць патрабавала ўжо неаднаразова.
Зміцер Міцкевіч, belsat.eu
