Беларусь не мае прамога выхаду да мора, аднак нашая краіна багатая на марскіх заўзятараў і энтузіястаў. Менавіта такія людзі зарганізавалі для беларусаў магчымасць азнаёміцца з унікальнаю марской фаўнай і наблізіцца да гісторыі мараплавання.
Мексіканскі памаранчавы рак, мангравы краб, блакітны лангуст і крэветка-доктар – усіх іх, а таксама іншых марскіх жыхароў можна ўбачыць у мабільным музеі «Адкрыты акіян».
Жоўтая субмарына ў самым цэнтры Менску – не толькі намёк на творчасць знакамітай ліверпульскай чацвёркі. Гэтак выглядае акіянарыум на колах, які адкрыў свой люк для ўсіх ахвотных азнаёміцца з унікальнымі для Беларусі жыхарамі марскіх глыбіняў.
«Наш музей мае вялікі адукацыйны складнік. Мы можам прыехаць у любы горад, у любы абласны цэнтр, вёску, дзе дзеці такога не бачылі. Яны могуць і з мікраскопам папрацаваць, і гэтак далей. У той жа час мы можам добрыя рэпартажы рабіць. У нас такая мабільная лабараторыя. Пад’язджаем да вадаёма, у нас ёсць падводныя камеры, запускаем іх у вадаём – дзеці ўсё тут бачаць на маніторах, можна ўсё запісваць і здымаць», – распавядае дырэктар музея Аляксей Азараў.
Наведнікі могуць азнаёміцца з вялікаю калекцыяй узнагародаў, мадэляў судоў ды іншых экспанатаў. Вялікая частка экспазіцыі расказвае пра гісторыю флоту, у якой значную ролю адыгралі і беларусы.
«Нашых землякоў чвэрць мільёну служыла ў мінулым стагоддзі на флоце, і 92 адміралы беларускага паходжання мы вылічылі. І я хачу сказаць, што гэта гонар нашай краіны, бо такой колькасцю «флотаўцаў» нават не кожная вялікая дзяржава можа пахваліцца», – звяртае ўвагу экскурсаводу музею Алег Гарбуноў.
Але праца для яго развіцця не спыняецца. Субмарына літаральна напоўненя інавацыйнымі для Беларусі тэхналогіямі. Гэтак, музей базуецца на альтэрнатыўнай энергіі – электрычнасць выпрацоўваецца ад сонечных батарэяў, таксама ёсць і ўласны вятрак.
«Вы паглядзелі, у нашай назве «музей-лабараторыя» напісана. Музей – бо прыходзяць знаёміцца з экспанатамі, а лабараторыя – тут сабраныя па кавалках цэнтры прыцягнення для дзетак, для іхнае творчасці. Гэта 3Д-фатаздымкі, 3Д-мадэляванне, біялагічная лабараторыя. У нас ёсць тры лічбавыя мікраскопы, у тым ліку вельмі добрыя, якія даюць цікавыя выявы. Мы плануем, што ў нас будзе працаваць КВ-радыёстанцыя», – пералічвае спадар Азараў.
Мабільны музей-лабараторыя дае беларусам магчымасць наблізіцца да акіяну, яго фаўны, гісторыі ды рамантыкі, хоць геаграфічна марское ўзбярэжжа да Беларусі не так і блізка.
Зміцер Міцкевіч, «Белсат»