Без расейскай нафты будзе цяжка, але пражывем, казаў у пятніцу Аляксандр Лукашэнка. Калі браць пад увагу хаду перамоваў паміж Масквой і Менскам, такі сцэнар выглядае ўсё больш рэальным. Чарговая спроба развязаць паліўны канфлікт – безвыніковая. Пра гэта паведаміў віцэ-прэмʼер Расеі Аркадзь Дварковіч пасля сустрэчы з беларускім калегам Уладзімірам Сямашкам. Тым часам, сам Лукашэнка ў Маскву не спяшаецца – анансаваная раней сустрэча з Пуціным адкладаецца.
«Чакаем новых прапановаў ад нашых калегаў. Але, у любым выпадку, мы чакаем аплаты за 2016-ты год» – адрапартаваў пра перамовы з Менскам адносна кошту на газ віцэ-прэмʼер Расеі Аркадзь Дварковіч.
Пасля трынаццаці месяцаў супрацьстаяння ніводзін з бакоў па-ранейшаму не ідзе на саступкі.
«Адбываецца такі дзіўны парадокс. Калі ў замежнай палітыцы Беларусь становіцца ўсё больш незалежнай. А ў эканоміцы Беларусь усё больш залежная ад Расеі. Доля Расеі ў замежным гандлі ў 2016 годзе вырасла да 45 %, хаця за год да гэтага яна была 38-39 %. І гэты парадокс неяк павінен быў выліцца ў канфлікт», – зазначыў палітычны аглядальнік Валер Карбалевіч.
Нафтаперапрацоўчыя заводы забяспечваюць найвялікшую долю валютнай выручкі нашай краіны. Як паведамілі нам у міжнародным коштавым агенцтве «Аргус», у студзені па трубаправодах «Транснефці» ў Беларусь паступіла менш за паўтара мільёна тонаў сыравіны.
Калі канфлікт не будзе развязаны, гэта азначае, што сёлета пастаўкі нафты знізяцца на 10 % у параўнанні з мінулым годам, калі яны ўжо былі на чвэрць меншыя за пазалеташнія.
Але Масква ўжывае і іншыя рычагі ціску.
«Сюды дадаюцца пытанні і беларускага газу, і беларускай малочкі, і беларускіх, гэтак-званых беларускіх рыбапрадуктаў», – патлумачыў эканаміст Вадзім Іосуб.
З Еўразійскай камісіі былі адкліканыя беларускія ўрадоўцы, а Аляксандр Лукашэнка адмовіўся падпісаць новы Мытны кодэкс саюзу.
«Без вырашэння гэтых праблемаў я нават не дакрануся да гэтага кодэксу. І да іншых пытанняў. Таму што гэта – жыццё нашай дзяржавы», – даводзіў кіраўнік Беларусі.
Аднак татальнага правярання пашпартоў на мяжы ФСБ пакуль не ўводзіць, але дэманструе такім чынам гатовасць ускладніць пастаўку ў Расею і іншых беларускіх тавараў, апрача харчовых, супраць якіх ужо дзеіць шэраг абмежаванняў «Рассельгаснагляду».
«Цяжка рабіць прагнозы нейкія, але я думаю, што канфлікт будзе вырашаны, таму, што ніводзін бок не зацікаўлены канчаткова спальваць масты і рваць адносіны», – падсумаваў Валер Карбалевіч.
Сінявокая патрабуе ўнутрырасейскай або прынамсі блізкай да яе цаны на газ.
Магчымага развязання гэтай спрэчкі чакалі на сустрэчы Аляксандра Лукашэнкі і Уладзіміра Пуціна ў Маскве, запланаванай на гэты чацвер. Але пасля безвыніковай сустрэчы віцэ-прэмʼераў у суботу Лукашэнка ехаць да свайго калегі адмовіўся. Афіцыйная прычына – няўзгодненасць графікаў.
Станіслаў Івашкевіч, Менск, фота: Yekaterina Shtukina / TASS / Forum