Запісаць дзіця ў найлепшы клас школы, што паблізу ад дому, і яшчэ каб у класе была група падоўжанага дня – місія для бацькоў будучых першакласнікаў.
Ці проста яе выканаць?
«Мы самі ў шоку, што такі ажыятаж тут».
«Я не думала, што ў звычайную школу могуць быць такія чэргі!».
– прызнаюцца бацькі.
Кожны стараецца аддаць дзіця ў школу, пра якую чуў добрыя водгукі, ці нават да канкрэтнага настаўніка.
Аднак першынства ўсё ж за будучымі вучнямі, што жывуць бліжэй. Шмат якім бацькам важна таксама запэўніць дзіцяці магчымасць хадзіць у групу падоўжанага дня, што не заўсёды магчыма.
Стартаваў прыём і ў гімназіях
У сталічнай гімназіі № 23 з беларускай мовай навучання на адсутнасць маленькіх абітурыентаў традыцыйна не скардзяцца.
«Тут валацугі не лаюцца матам, і 99 адсоткаў паступаюць у ВНУ – такога нідзе няма», – падкрэслівае жанчына.
Жыхарам жа навейшых раёнаў сталіцы – такіх, як Лошыца ці Каменная горка, выбіраць не даводзіцца: школаў там не стае. У сталіцы загружанасць адукацыйных установаў няроўная.
Менску патрэбныя школьныя аўтобусы
«У некаторых школах, асабліва ў цэнтры Менску, школы неўкамплектаваныя. Атрымліваецца, што некаторыя школы неўкамплектаваныя і іх трэба падтрымліваць, а ў іншых раёнах трэба будаваць новыя. І гэта нават з эканамічнага гледзішча нерацыянальна», – распавядае Дзяніс Кобрусеў з кампаніі «Генплан – для Менчукоў!».
Як адзін з варыянтаў развязання праблемы спадар Кобрусеў бачыць арганізаваныя аўтобусы, што давязуць дзяцей у цэнтральныя школы. Бо да выканання нормы – 145 школьных месцаў на адну тысячу жыхароў – у новых раёнах яшчэ далёка.
Пакуль жа бацькі спадзяюцца, што сын ці дачка сядзе за парту пажаданай школы. А ў школах гарачая пара прыёму дакументаў чакаецца не толькі бліжэйшымі днямі, але ў жніўні: перад самым пачаткам навучальнага года звычайна падаюць дакументы бацькі, што не маглі вырашыць, ці аддаць дзіця ў першы клас у 6 гадоў, ці пачакаць, пакуль споўніцца сем.
Марына Вашкевіч, «Белсат»
