Гэтак Аляксандр Лукашэнка паспрабаваў патлумачыць расейскім журналістам выгады беларускай эканамічнай мадэлі. Але тут жа сам выкрыў штукарства ўраду Беларусі з эканамічнымі прагнозамі. Запрошаныя на канферэнцыю афіцыйныя агенцтвы вырашылі пакінуць гэтае прызнанне па-за аб’ектывамі тэлекамераў, таму прыводзім ягоныя словы цытатаю.
«У гэтым годзе на 2% упадзе, як і ў Расеі. У наступным годзе нам прадказваюць падзенне на 1%-1,5% ВУП».
Паводле афіцыйнага прагнозу ўраду Беларусі, сёлета айчынная эканоміка мае, наадварот, вырасці на 0.3 %, а налета – таксама вырасці – ужо на 1.5 %. Зрэшты, тое, што ўрадавыя прагнозы ў разы больш аптымістычныя за рэчаіснасць – не навіна. Гэтак адбываецца апошнія восем гадоў. Цікава тое, што агучаны Лукашэнкам прагноз падзення ВУП на наступны год у разы горшы нават за прагнозы міжнародных фінансавых арганізацыяў. Міжнародны валютны фонд, напрыклад, прадказвае Беларусі налета падзенне эканомікі ўсяго на 0.5 %.
Тое, што ўнутрыўрадавы прагноз – горшы за ацэнку МВФ, магчыма, тлумачыцца тым, што міжнародныя крэдыторы выходзяць на сваю лічбу, зыходзячы з таго, што беларускія ўлады будуць чыніць тыя рэформы, якія абяцаюць. Самыя ж улады, ведаючы, што гэтага не будзе, загадзя рыхтуюцца да ўтрая горшага выніку. Віну за эканамічны спад у Беларусі кіраўнік краіны традыцыйна ўсклаў на расейскія праблемы.
Адмыслоўцы прызнаюць, што расейскі чыннік грае сваю ролю, але адзначаюць важны момант. Сярод усіх краінаў СНД, закранутых расейскім крызісам, Беларусь – адзіная, каму МВФ прадказвае працяг рэцэсіі налета. Прычына, паводле іх – неканкурэнтаздольнасць мадэлі дзяржаўнага кіравання эканомікай, якая перастала даваць рост яшчэ ў 2013 годзе – яшчэ на піку нафтавых коштаў ды аб’ёму расейскага рынку.
«Усе эканамісты недзяржаўнага сектару – адзіныя ў тым, што трэба праводзіць тыя глыбокія структурныя рэформы, якія патрабуюць ад нас крэдыторы», – упэўнены прафесар эканомікі Барыс Жаліба.
Незалежныя адмыслоўцы падкрэсліваюць, што калі вонкавыя чыннікі спрычынілі праблемы ўва ўсіх краінах СНД, то Беларусь – адзіная з іх, хто не мае механізму выйсця з гэтага крызісу – нават у выпадку здаражэння вуглевадародаў.
Адзін з асноўных камянёў, які цягне айчынную эканоміку ўсё глыбей на дно, – назапашаны аб’ём замежных крэдытаў, якія ўлады набралі за мінулае дзесяцігоддзе. Калі летась выплаты адных толькі адсоткаў па гэтых крэдытах склалі 1.5 ад ВУП, то сёлета – ужо чатыры. То бок пазыковая піраміда спрычынілася сёлета да падзення айчыннай эканомікі ў разы больш, чым, напрыклад, нафтагазавы канфлікт з Расеяй.
Станіслаў Івашкевіч, Менск