Аб'ектыў 18.01.2017 Лукашэнка падмануў народ і так не разабраўся з тарыфамі «ад балды»


Год мінуў, рэформу ЖКГ правялі, аднак разлікі зноў налічылі «ад балды». Днямі былы старшыня Вярхоўнага Савету Мечыслаў Грыб вырашыў параўнаць жыроўку за снежань з жыроўкаю за аналагічны перыяд пазамінулага года.

«Я ўзяў, паглядзеў, і апынулася, што больш як на 30 % за снежань я заплаціў больш, чымся за снежань 2015-га года. Тым больш што пенсія ў мяне засталася такая ж, якая была год таму». – параўноўвае спадар Грыб.

«Жэстачайшэ» не пакараў?

Разабрацца з вінаватымі ў завышаных коштах па разліках за паслугі ЖКГ ды надзець на іх кайданкі Аляксандр Лукашэнка загадаў яшчэ летась у лютым.

Неўзабаве тых, хто, паводле кіраўніка краіны, прыдумаў гэткую «балду» быццам бы арыштавалі, ажно дзясятак чалавек. Прынамсі гэтак паведамілі ўлады. Але канкрэтных імёнаў не агучылі. Нічога невядома пра таямнічыя справы і да сённяшняга дня. Урад жа ў сваю чаргу распачаў рэформу сістэмы жыллёва-камунальнай гаспадаркі.

Ці сталі за гэты год беларусы давяраць сістэме ЖКГ?

«Не давяраю. Чаму? Бо не апраўдана гэта ўсё. Не бачна наглядна, што і як».

«Не ведаю, ад чаго гэта залежыць, але яна не эфектыўная – гэта дакладна».

«Заўсёды любы кошт можна патлумачыць. Тут толькі майстэрства бухгалтара, так сказаць. Таму я гэтаму не давяраю».

«Давяраю, усё давяраю. Я давяраю свайму прэзідэнту»

– кажуць менчукі.

Да канца гэтага года насельніцтва Беларусі мусіць пагашаць 75 % ад агульнай сумы

Аднак сёння генеральны дырэктар прадпрыемства «Менская гарадская жыллёвая гаспадарка» Віталь Смірноў канстатаваў, што спажыўцы ўжо цяпер плоцяць больш за 60 % ад іх сабекошту. Адкуль узяліся гэтыя лічбы?

«Тыя лічбы, якія прадʼяўляе нам сістэма ЖКГ – яны неадэкватныя. Менавіта таму нельга сказаць, плацім мы зараз 60 %, 70, 80, ці будзем мы плаціць 100 % у будучыні ці плацім мы іх ужо зараз», – мяркуе былы працаўнік ЖКГ Павел Спірын.

Заплоцяць усе

Толькі планавае давядзенне коштаў на паслугі ЖКГ да стоадсоткавага пакрыцця – усяго на пяць долараў штогод – абяцаў падчас парламенцкіх выбараў кіраўнік Беларусі. Аднак і ў гэтым выпадку – з агаворкаю.

«Той, хто можа плаціць, мусіць плаціць, будзе плаціць. Хто мусіць і павінен, вы згодныя? Нават 150», – казаў Лукашэнка.

Мусяць заплаціць немалыя грошы за камунальныя паслугі беларусы і ў наступным месяцы, калі прыйдуць разлікі за студзень – месяц з моцнымі маразамі, які пацягне за сабой і моцныя рахункі за ацяпленне. Што праўда, цягам сямі дзён улады будуць вырашаць, як палягчаць гэткую фінансавую нагрузку ды ці размяркоўваць гэтую суму на вясеннія жыроўкі.

Віталь Бабін, «Белсат»

Глядзі таксама
Каментары