Абноўлены дэкрэт аб папярэджанні сацыяльнага ўтрыманства, больш вядомы як дэкрэт «пра дармаедаў», мае зʼявцца да першага кастрычніка. Аляксандр Лукашэнка адзначыў, што ў краіне прынамсі паўмільёна людзей не працуе. І толькі 200 тысячаў з іх можна вызваліць ад падатку – гэта шматдзетныя ці хворыя.
«Але 300 тысяч дзе? Таму дэкрэт № 3 – гэта 300 тысяч тых, хто павінен працаваць, але не працуе. І мы іх павінны прымусіць працаваць. Вось і ўся ідэалогія», – зазначыў кіраўнік Беларусі.
Гэтак званых «лістоў шчасця» – спавешчанняў з патрабаваннем сплаціць падатак – беларусам разаслалі сапраўды амаль паўмільёна.
Паводле Белстату, летась беспрацоўнымі сябе лічылі 5,8 % ад эканамічна актыўнага насельніцтва краіны, гэта каля 260 тысячаў чалавек.
Людзі не хочуць рэгістравацца ў цэнтрах занятасці: каб атрымаць там дапамогу, трэба абавязкова ўдзельнічаць у гэтак званых «грамадска-карысных працах» і рэгулярна паведамляць чыноўнікам, як менавіта ты шукаеш працу. А сярэдняя дапамога на беспрацоўе складае ў эквіваленце менш за $ 15.
Прафсаюз радыёэлектроннай прамысловасці разам з іншымі незалежнымі прафсаюзамі пачаў збіраць подпісы за павышэнне дзяржаўнай дапамогі беспрацоўным. Сёння да збору далучыліся актывісты грамадзянскай кампаніі «Гавары праўду!».
Актывісты маюць намер правесці яго і ў рэгіёнах. Між іншага, менавіта на мясцовыя ўлады ўскласці выкананне абноўленага дэкрэту прапаноўвае кіраўнік краіны.
Як іншы варыянт развязання «праблемы дармаедаў» урад прапаноўвае, каб тыя хто не працуюць, – цалкам аплачвалі паслугі, якія астатнім субсідуе дзяржава.
Ірына Дарафейчук, «Белсат», фота: Tolochko Viktor / ITAR-TASS / Forum