«Калі расейскія войскі застануцца на тэрыторыі Беларусі, то акрамя пікетаў будзе і ўзброены супраціў»
Расея груба парушае суверэнітэт і распачынае гібрыдную акупацыю Беларусі, праводзячы вучэнні «Захад-2017». Гэтак акрэсліў маштабныя расейска-беларускія манеўры на нашай тэрыторыі Зянон Пазняк.
Лідар Кансерватыўна-хрысціянскай партыі БНФ даслаў адмысловыя вітанні ўдзельнікам Асамблеі патрыятычных сілаў Беларусі, што праходзіць у Менску. У Партыі КХП-БНФ заклікаюць беларускіх патрыётаў да еднасці і гатоўнасці абараняць сваю краіну, як і запісана ў Канстытуцыі.
«Калі расейскія акупацыйныя войскі застануцца на тэрыторыі Беларусі, то акрамя пікетаў будзе і супраціў», – кажа прадстаўнік КХП-БНФ Алесь Чахольскі.
Да асамблеі далучыліся і лідары іншых нацыянал-дэмакратычных рухаў і партыяў. Маштаб вучэнняў «Захад-2017», якія пачынаюцца 14-га верасня, не адпавядае афіцыйна заяўленым мэтам, лічаць у апазіцыі.
«Войскі, якія там удзельнічаюць – больш, чым заяўлена. Тэхніка, якая там ёсць, больш, чым належыць па канвенцыях такіх вучэнняў. Акрамя гэтага, усе памятаюць прыклады, калі Расея пасля вучэнняў пачынала інвазію ў Грузію, ва Украіну, шмат хто думае, што на чарзе Беларусь», – падкрэслівае сустаршыня БХД Павал Севярынец.
Гэтыя дні мусілі б быць святочнымі ў Беларусі – 26 гадоў таму пазачарговая сесія Вярхоўнага Савету надала статус канстытуцыйнага закону Дэкларацыі аб суверэнітэце нашай краіны. Дыскусія і паказ дакументальнага фільму пра шлях да незалежнасці адбыліся напярэдадні ў менскай «Арт-сядзібе». І там адной з галоўных тэмаў стала пагроза, што ідзе ад вучэнняў «Захад-2017».
«Віна ў тым, што беларуская незалежнасць знаходзіцца пад пагрозай, цалкам ляжыць на кіраўніцтве краіны», – упэўнены прадстаўнік грамадскага абʼяднання «Дзея» Алесь Лагвінец.
Паводле афіцыйных звестак, у «Захадзе-2017» задзейнічаюць 680 адзінак тэхнікі і каля 13-ці тысяч вайскоўцаў з абедзвюх краінаў, прыкладна пароўну з кожнай. Кіраўніцтва суседніх краінаў і блоку НАТО кажа, што прасочыць, ці не будуць гэтыя лічбы перавышаныя. Згодна з міністрам абароны Эстоніі, насамрэч Расея мае магчымасць задзеяць да 100 тысячаў сваіх вайскоўцаў у Беларусі. У Маскве маштабныя манеўры называюць выключна абарончымі.
«Шуміха, якую раздзімаюць, мае штучны характар і яўна разлічаная на дэманстрацыю заходняй грамадскасці «абгрунтаванасці» затратных мерапрыемстваў для разгортвання ў Польшчы і краінах Балтыі ўзмоцненай перадавой прысутнасці ды нарошчвання вайсковай актыўнасці НАТО», – заявілі ў МЗС Расеі.
Але расейскія вайскоўцы дзеюць на беларускай тэрыторыі, не чакаючы верасня. Гэтымі днямі завяршыліся супольныя вучэнні тылавых і матэрыяльна-тэхнічных сілаў ды аператыўна-тактычныя вучэнні з авіяцыяй. Расейскія вайсковыя лётчыкі адпрацавалі пасадку ўдарных і транспартных самалётаў на беларускія аўтатрасы. Гэта – дарога Менск – Магілёў.
«Аэрадром, як паказалі падзеі ў Сірыі таксама, гэта адзін з першых абʼектаў авіяўдару. І гэты этап дазваляе нам выканаць размяшчэнне авіяцыі і працягваць ёй выконваць баявыя задачы ў выпадку, калі эвентуальны праціўнік захоча зрабіць аэрадром нядзейным», – заявіў намеснік камандуючага паветраных і супрацьпаветраных сілаў Беларусі Аляксандр Карэў.
Расейскія самалёты і верталёты перабазоўваюцца на беларускія аэрадромы. А пад Асіповічамі ўжо разгрузіўся эшалон расейскай бронетэхнікі, у тым ліку самаходныя гаўбіцы дальняга радыусу дзеяння.
Яраслаў Сцешык, belsat.eu
