«Нашая просьба вось якая», – прыкладна з такіх словаў пачыналіся ўсе размовы на спатканні з дэпутаткай Палаты прадстаўнікоў ад Абʼяднанай грамадзянскай партыі Ганнай Канапацкай. Якая скіравалася ў мікрараён Сокал. Ён хоць і знаходзіцца ў 15-ці кіламетрах ад Менску, юрыдычна лічыцца часткаю сталічнага Кастрычніцкага раёну. А значыць, акругай новай дэпутаткі. Пры гэтым акругай са шматлікімі праблемамі.
«Адсутнасць ходнікаў, адсутнасць якаснага асфальту, адсутнасць аддзялення банку ці аддзялення пошты. Вялікая праблема гэта адсутнасць дасугу для моладзі, бо пасёлак Сокал гэта месца з высокай нараджальнасцю».
Паводле жыхароў мікрараёну, уласна з высокай нараджальнасцю, да якой самыя ж чыноўнікі і заахвочвалі, цяпер гарадскія ўлады і не спраўляюцца. Дзяцей шмат, а вось дзіцячых дактароў толькі два, у выніку велізарныя чэргі ды гадзіны чакання прыёму. З дактарамі для дарослых не нашмат лепшая сітуацыя.
«Тут няма ніякіх лекараў-адмыслоўцаў, напрыклад кардыёлага нейкага. З усіх адмыслоўцаў толькі тэрапеўты прымаюць. А аналізы! На аналіз кроў з вены трэба запісвацца за тры тыдні! За тры тыдні каб здаць кроў!».
Гучала на спатканні і тэма бяспекі дзяцей, якой, паводле наведнікаў дэпутаткі, пагражаюць і шматлікія бадзяжныя сабакі, і ўмовы, у якіх дзеці дабіраюцца да школы. Гады ідуць, дэпутаты, і чыноўнікі змяняюцца, а праблема застаецца.
«Вось ужо 25 гадоў Сокалу, і ўсе гэтыя 25 гадоў дзеці як хадзілі, гэтак і ходзяць па праезджай частцы ў школу, побач з імі праносяцца аўтамабілі».
Але ёсць месцы ў Сокале, дзе пранесціся аўтамабілю не так і проста. Паводле Аляксандра Салдаценкі, не першы год дарогі ў прыватным сектары пасёлку замест асфальту маюць перыядычна падсыпаны пясок, які дождж або мокры снег ператварае ў багну.
«Нам прыйшоў адказ, што пытанне будзе разглядацца ў 2017-м гаду. Таму што грошай на пракладку дарог у новай частцы прыватнай забудовы, вось менавіта на нашую частку, у іх грошай не хапіла».
Сённяшняе спатканне дэпутаткі з грамадзянамі не першае. На папярэднім Ганна Канапацкая некаторым наведнікам параіла канкрэтныя захады для абароны сваіх інтарэсаў. Аднак, не ўсе гатовыя браць ініцыятыву.
«Я ім казала, як і што зрабіць. Пайдзіце туды, напішыце тое. І вось учора, перад прыёмам грамадзянаў я патэлефанавала тым, хто ў мяне ўжо быў, і я запытала, ці зрабілі вы штосьці з таго пра што мы казалі. Вы ведаеце, з шасці асобаў толькі адзін штосьці зрабіў. Калі людзі не хочуць дапамагчы сабе самыя, тады і я напэўна буду не ў стане дапамагчы ім».
Але пры гэтым Ганна Канапацкая абяцае прыкласці ўсе намаганні, каб не толькі навучыць грамадства актыўнасці, але і змагацца разам з імі.
Юрый Салодкі «Белсат»