Аб'ектыў 17.07.2017 Эканоміка Беларусі развіваецца на ўзроўні статыстычнай хібнасці


Найвышэйшыя тэмпы росту за сем гадоў паказвае сусветная эканоміка. Глабальныя біржавыя індэксы падняліся на мінулым тыдні да рэкорднай вышыні за ўсю гісторыю.

Захад цягне Беларусь

У скароце кажучы, Захад, прынамсі часова, урэгуляваў свой крызіс з запазычанасцю і пачаў больш спажываць. Гэта вылілася ў рост высокатэхналагічнага экспарту туды з Кітаю і сыравіннага – з Расеі ды іншых развіваных краін. Дзякуючы аднаўленню глабальных рынкаў павялічваецца сёлета і беларускі экспарт. Штопраўда, ад сусветных паказнікаў айчынная эканоміка адстае ў разы. У развіваных краінах, да якіх належыць і нашая, эканамічны рост сёлета чакаецца на ўзроўні 4 %. У

Беларусі афіцыйная статыстыка канстатуе за паўгады ўсяго 1 % росту ВУП, то бок у межах статыстычнай памылкі.

Краіну выціскаюць з сусветных рынкаў

Адставанне ў эканамічным росце азначае, што нашую краіну працягваюць выцясняць з сусветных рынкаў, у прыватнасці – з расейскага. Гэтак экспарт беларускіх цяжкавікоў у Расею павялічыўся сёлета ў паўтара разу. Але, паводле долі на расейскім рынку Менскі аўтазавод скаціўся з 4-га месца летась – на 9-е сёлета.

«Адставанне Беларусі ад сусветнай эканомікі, ад развіваных краін і нават ад развітых краін сведчыць, што структура беларускай эканомікі застрала глыбока ў мінулым. І няма ніякай палітычнай волі яе мяняць», – падсумаваў эканаміст Вадзім Іосуб.

Адмыслоўцы тлумачаць – тое, што адбываецца цяпер – стандартная фаза г.зв. дзелавога цыклу. Пасля працяглага спаду эканоміка расце крыху хутчэй, а потым, каб не перагрэцца, зноў запавольваецца. Але тое, што для нашых суседзяў будзе запавольваннем, для Беларусі пагражае стаць чарговым правалам у рэцэсію.

Станіслаў Івашкевіч, Менск, фота: Vasily Fedosenko / Reuters / Forum

Глядзі таксама
Каментары