Наведанне школьнікаў удома, збор макулатуры ды нават збор аналізаў калу. Гэта толькі невялікая колькасць абавязкаў, якімі сярэдняя школа нагружае настаўнікаў у дадатак да выкладання.
Расце, аднак, толькі колькасць абавязкаў. Апытаныя намі настаўнікі сцвярджаюць, што заробкі ў іх не падымаліся ўжо два гады.
АЛЕСЬ СЯДЗЯКА, НАСТАЎНІК-МЕТАДЫСТ:
«Некалькі разоў падвышаліся, спрабуючы дагнаць сярэдні заробак па краіне. Але ніяк не дагоняць. А апошнія два гады, я ня памятаю, каб падвышаліся».
На сёння, паводле Белстату, сярэдні заробак у галіне адукацыі складае крыху больш за 500 рублёў – значна ніжэй за сярэдні па краіне.
ЖЫХАРЫ МЕНСКУ:
«Я зараз вучуся ў інстытуце, у мяне падвойная спецыялізацыя, я магу стаць настаўнікам. Але, па-шчырасці, ня вельмі хочацца. Бо, па-першае – недастойны заробак».
«Дачка вось цяпер выпускніца пятага курсу і цяпер яна выкладчыкам геаграфіі. Заробак – зусім малы»,
«Трэба павышаць значна. І ўвогуле настаўнікам трэба ўдзяляць больш увагі».
Адмыслоўцы б’юць трывогу: праз недастатковую аплату гэтае працы якасць кадравага складу сярэдніх школаў няўхільна падае. Вучыцца на педагагічны факультэт ідуць збольшага тыя, хто не здолеў трапіць ні на якую іншую спецыяльнасць.
АЛЕСЬ СЯДЗЯКА:
«Даходзіць да анекдотаў. На спецыяльнасць настаўнікаў прымалі абітурыентаў, якія па мінімуму напісалі тэст цэнтралізаваны па профільным прадмеце. Такія і спецыялісты, нажаль, зараз выходзяць з педагагічных універсітэтаў».
Крытычнасць сітуацыі сёлета прызнаў нават кіраўнік краіны. Напярэдадні парламенцкіх выбараў Лукашэнка даў публічнае даручэнне знайсці сродкі на павелічэнне заробкаў педагогам «прынамсі б на чвэрць».
Сродкі на гэтае павелічэнне кіраўнік краіны аднак загадаў шукаць у самой сістэме адукацыі. У выніку выбары прайшлі, год на зыходзе, і настаўнікі цяпер спадзяюцца на выкананне абяцанага налета. Але адмыслоўцы адзначаюць, што пры існым падыходзе гэтыя надзеі зноў могуць апынуцца марнымі. Бо бюджэтных сродкаў на адукацыю налета вылучылі, у рэальным вымярэнні, не больш, як сёлета.
Станіслаў Івашкевіч, Менск
