Вельмі аператыўна адрэагавала на матэрыял тэлеканалу «Белсат» кіраўніцтва фермы Разанава, што каля вёскі Завараты на Глыбоччыне.
«У аўторак паказалі пра гэтых цялят як яны стаяць амаль пад адкрытым небам і ўжо ў чацвер іх з фермы забралі і вывезлі ў другое памяшканне», – распавядае Дзмітрый Лупач, мясцовы жыхар.
Вялося ў матэрыяле пра экстрэмальныя ўмовы ўтрымання цялят, якія зімуюць літаральна ў снезе, бо дах фермы калісьці разабралі на іншыя патрэбы.
У красавіку на чацвёртакласніка саракавой школы Менску падчас спартландыі звалілася футбольная брама. Хлопчыка з цяжкімі траўмамі даставілі ў рэанімацыю.
Справу па факце атрымання траўмаў, а гэта пералом асновы чэрапа і касцей чэрапа з двух бакоў, нечакана спынілі з фармулёўкаю: няма прыкметаў складу злачынства з боку адміністрацыі школы.
На маці хлопчыка пачалі ціснуць адміністрацыя школы, пракуратура і Следчы камітэт зрабілі вінаватым у траўме само дзіця.
«Выклікалі мяне ў райвыканкам, пачалі змушаць падпісаць паперы, што я сама здам мужа інваліда першай групы, якога збіла міліцыя, і дзіця ў прытулкі, ішлі пагрозы, што забяруць іх», – узгадвае Святлана Калантай, гераіня матэрыялу «Белсату».
Пасля выхаду напрыканцы ліпеня матэрыялу на «Белсаце» ціск на жанчыну прыпыніўся, а яе жыллёвыя ўмовы палепшыліся.
«Далі мне пакойчык на Сонечнай, дом стары, пакойчык маленькі, але там жывем. Сын вучыцца ў іншай школе. Нібыта нічога», – кажа Святлана.
Перасталі ціснуць і яшчэ на аднаго героя рэпартажу «Белсату» пасля таго, як матэрыял пра яго прайшоў на тэлеканале.
«Пасля таго як я звярнуўся да журналістаў улады мяне пачулі і перасталі цягаць па судах», – прызнаецца Мікалай Сныткоў.
Мікалай з Гомля, інвалід другой групы, ветэран працы, жыве ў аварыйным доме, які мясцовыя ўлады назвалі інтэрнатам і спрабавалі перасяліць жыхароў у іншы інтэрнат.
Паводле стану здароўя спадар Мікалай жыць у гэтым інтэрнаце не змог бы. Зрэшты, цяпер яго да гэтага і не змушаюць. Ягоны дом прызналі жылым, а не інтэрнатам, і цяпер вядзецца размова аб прадстаўленні яму сацыяльнага жытла.
«Дзякуй журналістам што прыцягнулі ўвагу ўладаў, я думаю што сітуацыя вырашыцца на маю карысць і журналісты будуць трымаць маё пытанне на кантролі», – спадзяецца спадар Сныткоў.
Так, «Белсат» будзе сачыць за развязаннем гэтай ды іншых праблемаў, пра якія мы распавядаем у сваіх матэрыялах. І, натуральна, шукаць новых тэмаў для рэпартажаў.
Ірына Дарафейчук, «Белсат»