Паседжанне суда Цэнтральнага раёну Гомля магло стацца перамогаю правасуддзя, але скончылася нічым. Суддзя адмовіўся разглядаць справу пазоўніка Аляксандра Сямёнава аб прызнанні дэкрэту нумар тры «Аб папярэджанні сацыяльнага ўтрыманства» неканстытуцыйным. Прычына – праз «непадведамаснасць».
Падтрымаць гомельца на сённяшні працэс прыйшлі з дзвесце чалавек, якія патрабавалі адмяніць падпісаны Аляксандрам Лукашэнкам закон.
«Я жыву на хлебе і вадзе, а яны жыруюць».
«У Маскве кажуць, што беларусы – гэта тыя самыя таджыкі. Бо працуюць за капейкі, бо няма куды падзецца ўжо»
– абураюцца гомельцы.
Аляксандр Сямёнаў патрабаваў ад падатковай інспекцыі вызваліць яго ад аплаты за гэтак званае дармаедства. Бо ў 2015-ым годзе ён і без таго браў удзел у фінансаванні дзяржаўных выдаткаў.
Напярэдадні стала вядома, што 53-охгадовага гомельца ў пазасудовым парадку вызвалілі ад павіннасці. І нават запрапанавалі працу вартаўніком у адной з арганізацыяў.
На сённяшняе паседжанне прыйшлі не толькі тыя, хто выступае за адмену нашумелага дэкрэту, але і здымачная група тэлеканалу «Беларусь 4». Пратэстоўцы паставілі ім у прыклад іншых журналістаў, якія не праігнаравалі шматтысячнага маршу недармаедаў, што прайшоў у Гомлі 19-га лютага.
Усяго ж падатковыя органы разаслалі беларусам 470 тысячаў гэтак званых «лістоў шчасця». Але сплацілі падатак менш як 55-ць тысячаў асобаў, праз што бюджэт папоўніўся на крыху больш за 16-ць мільёнаў рублёў – у 10 разоў менш, чымся планавалі ўлады.
Віталь Бабін, «Белсат», фота: БелаПАН