Менш за статыстычную хібнасць. Апытанне, праведзенае прафсаюзам працаўнікоў радыёэлектроннай прамысловасці, паказала – толькі адзін адсотак грамадзянаў верыць, што пенсійная рэформа праводзіцца ў іх інтарэсах. Восем з дзесяці апытаных перакананыя, што выйграюць дзяржава і чыноўнікі.
Другі год рэалізацыі пенсійнай рэформы ў Беларусі. Чатыры – яшчэ наперадзе. Улады шматкроць тлумачылі.
«Калі б мы нічога не змянялі, да 30-га году на адную асобу старэйшую за працаздольную прыпадаў бы 1,7 працоўны фактычна», – заявіў намеснік міністра працы і сацыяльнай абароны Валер Кавалькоў.
Аднак выглядае, што сярод грамадзянаў дагэтуль няма ці разумення, навошта патрэбнае, напрыклад, падвышэнне пенсійнага ўзросту, ці веры тым, хто кіруе краінаю.
Праведзенае сёлета ў студзені даследаванне недзяржаўнага прафзвязу РЭП выявіла: толькі адзін адсотак грамадзянаў верыць, што змены будуць ім на карысць. Затое амаль кожны другі перакананы: выйграюць толькі чыноўнікі, кожны трэці – дзяржава.
НА ЧЫЮ КАРЫСЦЬ ПРАВОДЗЯЦЬ ПЕНСІЙНУЮ РЭФОРМУ? (агульнанацыянальнае апытанне прафсаюзу РЭП)
– ГРАМАДЗЯНАЎ 1 %
– ЧЫНОЎНІКАЎ 43 %
– ДЗЯРЖАВЫ 38 %
Чатыры гады таму Лукашэнка тлумачыў негатоўнасць рэфармаваць сістэму акурат жаданнямі людзей.
«Людзі не хочуць павышэння пенсійнага ўзросту. Я не магу сёння ісці ўпоперак волі людзей», – заяўляў Лукашэнка.
Але ўжо ў шаснаццатым годзе падпісаў указ «Аб удасканаленні пенсійнага забеспячэння». Згодна з ім, да дзве тысячы дваццаць другога года мінімальны ўзрост дзеля атрымання працоўнай пенсіі мае дасягнуць пяцідзесяці васьмі гадоў для жанчын і шасцідзесяці трох – для мужчынаў.
«Няма ў бюджэце грошай больш на тое, каб трымаць такую колькасць пенсіянераў, якая ўсё павялічваецца. А ў звязку з дэмаграфічнай сітуацыяй колькасць пенсіянераў павялічваецца, а колькасць працуючых у эканоміцы змяншаецца», – адзначае палітычны аглядальнік Валер Карбалевіч.
Недахоп грошай у пенсійным фондзе выявілі ўпершыню ў дзве тысячы чатырнаццатым. Падвышэнне пенсійнае планкі мае выправіць сітуацыю. Настойліва рэкамендаваў правядзенне рэформы і Міжнародны валютны фонд. Аднак яна не будзе эфектыўная без структурных эканамічных, палітычных і сацыяльных рэформаў, зазначае адмысловец.
«Тут гаворка можа ісці толькі пра тое, як паменшыць колькасць пенсіянераў. З гэтага боку, як ні дзіўна, чым менш жывуць беларусы, тым гэта лепш для беларускай пенсійнай сістэмы», – кажа эканаміст Леў Марголін.
У гэтым кантэксце асабліва драматычна выглядае сітуацыя з беларускімі мужчынамі, сярэдняя працягласць жыцця якіх на сёння толькі на тры гады перавышае запланаваны рэформаю пенсійны ўзрост.
Лола Бурыева, «Белсат»
Фота – REUTERS/Vasily Fedosenko