"Зачыстка" у Крупках

У Крупках, дзе ў пятніцу і суботу амапаўцы беспрычынна збілі некалькі дзясяткаў чалавек, прайшлі суды. Затрыманыя атрымалі штрафы 700 тысяч рублёў.

18 і 19 лістапада сталічная міліцыя завітала ў мястэчка і правяла “зачыстку” двух мясцовых клубаў. Адмыслова для гэтага разам з праваахоўнікамі прыехаў нават аўтазак. Паводле словаў сведак і пацярпелых, амапаўцы ў чорнай форме ўрываліся ў клубы і загружалі ў аўтазак усіх, хто ім не падабаўся. “Зачыстка” працягвалася, пакуль былі месцы ў аўтазаку.

“Мы сядзелі ў клубе з пляменнікам і дачкою, раптам запалілася святло, і я пачуў гук удару. Азіраюся, а там такі здаровы амапавец ударыў хлопца ў твар, ад чаго той адляцеў і галавой рассек нейкай дзяўчыне брыво, пасля чаго хлопца забралі. Забіралі людзей без усялякага прынцыпу – проста тых, хто не спадабаўся. Ніякай там бойкі не было, і п’яных асабліва таксама, яны хапалі ўсіх, хто блізка быў. Атрымліваецца, зараз ні нам, ні дзецям нашым нават схадзіць на дыскатэку нельга! Як увогуле далей жыць?” – абураецца Аляксандр, сведка падзеяў.

Былому міліцыянту Руслану пашанцавала менш: “Мы з сябрамі выйшлі з дыскатэкі ды пайшлі ў краму купіць папіць. За намі зайшлі каля 20 амапаўцаў. У краме стала цесна, і хтосьці выпадкова штурхнуў аднаго з іх. Яны пачалі крычаць на чалавека і пагражаць яму. Я зрабіў заўвагу, нагадаўшы пра дырэктыву прэзідэнта “аб ветлівым звяртанні да грамадзянаў”. Тады яны мяне скруцілі ды кінулі ў аўтазак”.

Пасля гэтага ў пастарунку амапаўцы пагражалі Руслану дубінкаю і збівалі затрыманых з ім сяброў. Паводле рапарту, Руслан напаў на 20 амапаўцаў, лаяўся на іх матам і г. д.

Малады чалавек зазначае, што мясцовыя міліцыянты самі баяліся гасцей з сталіцы: “Ды яны ўвогуле пры іх шэптам размаўлялі. Капітан да гэтага сяржанта (амапаўца) падыходзіў і казаў: дазвольце звярнуцца...”

Паводле Менгарвыканкаму, гэта была прафілактычная акцыя, накіраваная на перадухіленне правапарушэнняў. “Насамрэч гэтая “прафілактычная акцыя” проста паказала тую неабмежаваную ўладу, якая цяпер у руках міліцыі, і прадэманстравалі такі ўзаконены гвалт. Гэта агульная тэндэнцыя, якая зараз ідзе ў краіне – нармальная з'ява для паліцэйскай дзяржавы. Калі ў краіне ўсё трымаецца абсалютна на спецназе, калі раней яны разумелі, што знаходзяцца па-за законам у дачыненні да нейкіх актывістаў, то зараз гэта ўжо разраслося”, – каментуе рэйд міліцыянтаў праваабаронца Уладзімір Лабковіч.

Упраўленне ўнутраных справаў Менскай вобласці адрэагавала на падзеі ў Крупках. Паводле мясцовых жыхароў, менскія міліцыянты зладзілі рэйд, у ходзе якога затрымлівалі ды збівалі тых, хто не спадабаўся сталічным праваахоўнікам.

Пра гэта кажуць і пацярпелыя, і сведкі падзеяў. Паводле ж версіі Менаблвыканкаму, у Крупскім раёне склалася цяжкая крымінагенная сітуацыя. З мэтаю прафілактыкі на дапамогу мясцовай міліцыі выслалі 11 менскіх аператыўнікаў. Прыбыўшы на месца, праваахоўнікі ўбачылі нецвярозага мужчыну з бутэлькаю піва ў руках, якога нібыта не пусцілі ў клуб. Не паспелі міліцыянты запрапанаваць яму высветліць справу на вуліцы, як грамадзянін пачаў пагражаць ім звальненнем з працы і сваімі сувязямі, у выніку чаго быў затрыманы.

У самым клубе на працаўнікоў міліцыі напаў нецвярозы мужчына, ударыўшы ўчастковага нагою ў твар. Пасля гэтага на хулігана надзелі кайданкі. Менаблвыканкам падкрэслівае, што гэта быў адзіны выпадак ужывання спецсродкаў.

Праваабаронцы заклікаюць усіх пацярпелых і незаконна асуджаных звяртацца ў суд з абскарджаннем прысудаў. Праваабарончы цэнтр “Вясна” прапаноўвае сваю дапамогу ў напісанні скаргаў і заяваў на дзеянні міліцыі.

belsat.eu