Сяргей Падсасонны

Вядоўца «Студыі “Белсат”»

Як казаў мой выкладчык беларускай літаратуры, я «нарадзіўся звычайным парадкам». Заўсёды марыў пра журналістыку, але ніколі не думаў, што гэта магчыма. У сям’і пераконвалі, што нягледзячы на медаль веды пасля вясковае адзінаццацігодкі – недастатковыя для гэткае ганаровае прафесіі, журналістыкі.

Ведаў хапіла, каб паступіць на філфак Гомельскага дзяржаўнага ўніверсітэту, а пазней – у аспірантуру, павучыцца на псіхалагічным факультэце, працаваць настаўнікам і выкладчыкам. І ўсё ж журналістыка не давала спакою. Сяброўка, якая заўсёды марыла пра журналістыку, прапанавала разам паехаць у школу журналістыкі на ўступныя іспыты. Мяне прынялі, сяброўку – не.

Потым выпадкова трапіў на кастынг «Белсату» ў Варшаве. Запрашалі іншага чалавека, але ў дзяўчыны не было візы, яна патэлефанавала апоўначы: ці паеду зранку замест яе? Паехаў. З таго часу звязаны з тэлеканалам.

Апрача журналістыкі займаюся літаратуразнаўствам. Аўтар кнігі «Грэх паводле Дастаеўскага», шматлікіх навуковых артыкулаў. Абараніў дысертацыю аб творчасці Дастаеўскага ў Варшаўскім універсітэце, маю навуковую ступень доктара гуманітарных навук.