Алесь Залеўскі

Журналіст, вядоўца інфармацыйнага блоку «Студыя “Белсат”». Аўтар і вядоўца праграмы “Людскія справы”.

Нарадзіўся ў вёсцы Абухава пад Горадняй (13 км). У год атрымання пашпарту прайшоў адбор у легендарны праект «Школа маладога журналіста» пры цэнтры грамадскіх ініцыятываў «Трэці сектар». Па выніках праекту друкаваўся ў газетах «Głos znad Niemna», «Биржа информации», «Вечерний Гродно».

У год галасавання за неабмежаваныя тэрміны для першага прэзідэнта паступіў у Менск на філфак БДУ. Пасля атрымаў дыплом палітолага ў Варшаве (Collegium Civitas) ды вярнуўся ў родную Горадню. Там каардынаваў «Школу маладога журналіста-10», рэдагаваў моладзевае радыё «Твой Стыль», працаваў рэгіянальным карэспандэнтам «Еўрапейскага радыё для Беларусі».

У адзін ліпенскі спякотны дзень 2007-га, калі дапамагаў бацьку даглядаць пчолы, патэлефанавалі ды запрасілі на «Белсат». Там працую і да сёння. Часам бяру ўдзел у рознага кшталту адукацыйных і грамадскіх праектах, фестывалях ды іншых публічных імпрэзах у Менску і Горадні.

У вольны час – спорт амаль штодня. Гэта бег, футбол, баі без правілаў ці проста ровар (на працу і назад). Стараюся багата чытаць – ад мастацкай да прафесійнай літаратуры. З музыкі – джаз, класіка і па кавалку амаль з кожнага жанру. Таксама люблю лес, вёску, лазню і яшчэ такія-сякія рэчы, пра якія тут пісаць не выпадае.