Па факце гібелі жаўнера Аляксандра Коржыча ў 72-м Аб’яднаным вучэбным цэнтры ў Печах пад Барысавам следчыя распачалі 5 крымінальных справаў. Пра гэта паведаміў міністр абароны Андрэй Раўкоў.
14 лютага падчас прэс-канферэнцыі міністр абароны пацвердзіў інфармацыю, што цела жаўнера знайшлі на сёмы дзень пасля смерці.
Андрэй Раўкоў таксама заявіў, што да смерці жаўнера магло спрычыніцца выхаванне ў сям’і, настаўнікі і «агрэсія на экранах камп’ютараў».
Госць праграмы «Гарчы каментар», апазіцыйны палітык ды лідар Абʼяднанай грамадзянскай партыі Анатоль Лябедзька жорстка раскрытыкаваў заяву Раўкова.
«Колькі б ты зараз не ўзбуджаў крымінальных спраў – гэта будзе толькі спробаю зацерці на мундзіры плямы смерцяў у Печах», – заявіў Лябедзька.
Заяву міністра абароны ў эфіры нашага тэлеканалу таксама пракаментавала маці Аляксандра Коржыча.
«Саша ў нас рос у дабрабыце і атрымаў нармальнае выхаванне. Уся сям’я яго рыхтавала да войска. У нас было так: сын – гэта жаўнер», – распавядае Святлана Коржыч.
Маці Аляксандра Коржыча сцвярджае, што «калі б ён [міністр абароны. – Заўв. Belsat.eu] убачыў цела, то ён бы не сказаў, што Саша правісеў 7 дзён».
Нагадаем, 21-гадовага жаўнера Аляксандра Коржыча 3 кастрычніка знайшлі павешаным у падвале на тэрыторыі вайсковай часткі ў Пячах. Труп Коржыча знайшлі са звязанымі шнурком нагамі і надзетай на галаву майкай. Паводле сваякоў і сяброў Аляксандра, хлопец стаў ахвярай дзедаўшчыны.
Больш у відэа!
Фота: tut.by