Беларуская баскетбалістка Кацярына Сныціна правяла апошні матч у сваёй кар’еры і выйграла яго: ейная каманда стала чэмпіёнам Вялікай Брытаніі.
19 траўня адбылася фінальная гульня чэмпіянату Вялікай Брытаніі, у якім каманда Кацярыны Сныцінай «London Lions» перамагла каманду «Newcastle Eagles» з лікам 92:65.
Гэта была апошняя гульня ў спартовай кар’еры Кацярыны і другі чэмпіёнскі тытул, які яна заваявала для сваёй каманды.
У красавіку 2024 года «London Lions» з непасрэдным удзелам Кацярыны заваявала Еўракубак – гэта другі па значнасці баскетбольны турнір у Еўропе.
Кацярына Сныціна неаднаразова станавілася чэмпіёнкай Беларусі, Францыі, Вялікай Брытаніі, Польшчы, мае трафеі кубку Польшчы, прэзідэнта Турэччыны і Еўракубку.
Вядома, што ў 2020 годзе Кацярына Сныціна падтрымала пратэсты і выступіла супраць фальсіфікацыі выбараў, а таксама супраць гвалту, які чынылі ў паслявыбарчы час сілавікі рэжыму Лукашэнкі. У 2021 годзе яна была выключана са складу зборнай Беларусі.
Раман Шавель belsat.eu
